AIBAk elkarte dinamikoa izan nahi du. Horren kideak dira Banka, Aldude eta Urepeleko biztanleak ; beren herria – sorterria edo hautatu dutena – maite dutenak, Aldudeko ibarrean bizitzeaz harro direnak. Nahi dute zaindu, orai bezala izan dadin lasaia, berdea, bizitzeko atsegina, … baina ez motela !
Nahi dute ibarra biziarazi, mugiarazi, aldarazi, gogoetatuz haren etorkizunaz, beren etorkizunaz.
Zer behar ote da aldatu, ekarri, hobetu kanpotiarrak hunat etor ditezen bizitzerat, baina ere, bereziki, hor sortu direnek segi dezaten hor bizitzen ?

AIBAren lana gogoeta eta talde lanetan da oinarritzen. Arlo hauek ditu jorratzen : lurraldearen promozioa, turismoa, ingurumena, sail soziala, kulturala, kirola.
AIBAren aberastasuna bere kideen ainiztasuna da : gazte eta ez hain gazte, berriki instalatuak eta bertan sortuak, partikularrak eta profesionalak, elkarteak eta hautetsiak. Bai, AIBA deneri idekia da, eta hitza emaiten dio nahi duenari.

Baina ez da hori guzia. Eta ez…
AIBA, oihua da, edo kasik.
Orduan goazen, gu abiatuak gira !
Heldu zirezte ?
AIBA!!!!!!!!!!

AIBA aitzin, bazen ACVA.
ACVAk (Aldude Ibarreko Merkatarien Elkartea) 20 urtez, bi urtetarik behin, antolatu ditu Ibarreko Ate Idekiak, tokiko ofiziale, merkatari eta laborarien laguntzarekin. Hori izan da Alduden haragile den Pierre Oteizaren iniziatiba. Ate Ideki horiek dira feria gastronomikoa, 3 herrietako ofizialeak eta laborariak biltzen dituena asteburu batez, gehienetan urri erditsutan. Parada da Ibarra ezagutarazteko, bai eta agerian ezartzeko ere dauzkan ekoizpen eder eta onak !
Urteak pasa arau, ekitaldi hori gero eta arraskatatsua bihurtu zen.
2006 irian, ACVAk erabaki du urrunago joaitea eta gai bat hautatzea ate ideki bakotxarentzat, aitzinetik landuko duena, gogoetak eta eztabaidak sustatuz.

Elkartea eraldatu da 2012an. Ate idekien gaia da orduan “Ibarra 2030ean”. Ideia da 2030ean proiektatzea, ibarrean, eta galderak pausatzea : zer hobetu beharko liteke hemendi horrat ? Zer da eskas jadanik egun ? Dinamika bat abiatzen da, eta biztanle guziak gomit dira parte hartzerat. Bilkura publikoak antolatuak dira. Problematika eta gai anitz jorratuak dira, barnatuak, eta ondorioz, ordurarte ekonomian, turismoan eta laborantxan soilik oinarritzen zen elkarteak erabakitzen du bertze arlotan lan egitea : ingurumena, soziala, kultura, kirola.

Berritze horren sinbolo gisa, ACVA bihurtu da AIBA, Aldudeko Ibarra Beti Aintzina.
Elkarteak aldatu ditu bere araudiak eta ateak ideki biztanle guzieri. Haren helburua da ibarrean bizitza hobetzea gogoeta eta talde lanaren bidez.

Azken ate idekietan, 2016an, gaia zen “Herrian laketu”.
Helburua zen biztanleek ibarrean bizitzeko nahia, nahiz eta zailtasunak dauden, bai eta gure lurraldearen erakargarritasunaz gogoetatzea ere.
Gai orokor horrek 3 azpi-gai zauzkan :
-ETXE HUTSAK: gure herrietan, karriketan, etxeak husten dira. Zer egin horren kontra ?
-INTEGRAZIOA: Nolako harrera egiten zaie kanpotik etorri berrieri ? Nola lagundu integratzen ?
-MUGIKORTASUNA: gogoetatzen ahal datekea elgarrekin mugitzeko manera batez, ez gaiten gehiago bakotxa gure autoan ibil ?
Gogoeta horien aitzinarazteko, bai eta ate idekiak ere prestatzeko, hamabortz bat kide bildu dira erregularki administrazio kontseiluan 8 hilabetez. Horietan partikular, elkarte, merkatari, ofiziale, laborari, enpresa buru, hautetsiak.
Ideia batzu sortu dira ate ideki bakotxaren lehen aratsean egin den eztabaida partehartzailean. Ez dira ahantzi behar ate idekien batzorde ezberdinetan laguntzen dutenak (kabala lehiaketa, Kintoa Kurri lasterkaldia, kantaldia, ofizialeen herrixka, artzain xakur lehiaketa, bertsu saio, eta abar).

Ate idekien desmartxa ber-bera gelditzen da. Egun, Ate idekiek 4 egun irauten dute, beti ere urriaren lehen bi asteetan, 2 urtetarik ; 6 000 bisitari heldu dira urtero, guti gorabehera.
Hori izaiten da ibarraren mementu garrantzitsua, biztanle guzientzat. Denek parte hartzen dute, hurbiletik edo urrundik. Elkartasun eta besta mementua da ere bai !

Hobeki ulertzeko, hobe jitea…
Horra hitzordua hartua 2018rako!